,,ჰორიზონტი ევროპა'' ზუგდიდში ახალგაზრდა მეცნიერთა კვირეულის სამეცნიერო ფესტივალს შეუერთდა
16-17 სექტემბერს, ქალაქ ზუგდიდში, ჩატარდა ახალგაზრდა მეცნიერთა კვირეულის ფარგლებში ორგანიზებული სამეცნიერო ფესტივალი, რომელსაც ,,ჰორიზონტი ევროპაც’’ შეუერთდა.
“ჰორიზონტი ევროპა” ეროვნული ოფისი ფესტივალზე კულტურული მემკვიდრეობისა და სოციალური პრობლემების მიმართულებით მიმდინარე კონკურსების შესახებ პრეზენტაციით წარსდგა.
ღონისძიების აკადემიური ნაწილი ქართველი და უცხოელი პროფესორების ჩართულობით, ინტერდისციპლინური კვლევების მიმართულებით, გამართულ საჯარო ლექციებს, ვორქშოფებსა და დისკუსიებს მოიცავდა.
საგამოფენო ნაწილში, მეცნიერების პოპულარიზაციის მიზნით, ზუგდიდის ბოტანიკური ბაღის ტერიტორიაზე ღონისძიების პარტნიორებთან ერთად წარმოდგენილ იქნა სახალისო საგანმანათლებლო-კვლევითი ექსპერიმენტები, კრიმინალისტიკის ლაბორატორიული ცდები, ფარმაცევტული პრეპარატების ტექნოლოგიის ექსპერიმენტები და პირველადი სამედიცინო დახმარების მასტერ-კლასები, ვეტერინარიის ლაბორატორიული ექსპერიმენტები, ისტორია - არქეოლოგიის გამოფენა, ბიოტექნოლოგიების გამოფენა.
